الحقيقة

وفضلت أدور علـ الحقيقة
ملقتش ليها أدنى أثر
قت أدوَّر فـ الدويقة
يمكن تكون تحت الحجر
تحت أنقاض التراب
بين البشر
ولما سألت علـ الأسباب
وإيه ذنب الناس البريئة


قالوا القدر ...
والذنب أصلا ذنبهم
هما اللى وثقوا فـ الحجر
وسلموا له قلبهم
ولما غدر
هدّ فـ بيوت حلمهم
الحقيقة ملهاش وجود
الحقيقة معنى أندثر
الحقيقة
أنك تعيش وحدك حزين
جـُوّه الحدود
فـ دنيا مليانة بالبشر


وقالوا كتير ....
كلام مسموع بحس حزين
جـِراح بتزيد
وزاد الجرح وجع وأنين
قلوبنا العتمة ملياها
ومش حاسة شعاع النور
وموجة حزن واخدانا
تغرقنا ... تفرقنا
ونتمنى تفارقنا وتنسانا
وبستان الفرح مهجور
زهور البسمة دبلانة
ومزروعة فـ قصيص مكسور
مشتاقة لنقطة حب
تصحى الحب جوانا
تصحى الحنين فـ القلب
يعدى الوقت ... نستنى
ونتمنى الحقيقة تبان
تكون واضحة
ونتغنى بتـَلـَت ألحان
لحن السعادة والفرحة
ولحن النصر والتمكين
وأغصان الزتون طارحة
ولحن الحب بعد سنين
سنين غـُربة
سنين عمرنا الهاربة
من الظلم اللى فيه عايشين
ونحلم أمتى يجى اليوم
ونشوف مـ الهنا ألوان
نعيش الحق
نحس بقيمة الإنسان
__________________

شكرا لك على كل المجهود الذي بذلته أيها الأخ الكريم